सांगली : सांगली जिल्ह्यात कोरोनाग्रस्त रूग्णांची भर वाढतच असून आज कोरोनाग्रस्तांचे सहावे शतक पुर्ण झाले. जिल्ह्यात आज नव्याने २८ जणांना कोरोनाची बाधा झाली असून त्यात सांगलीतील ७ आणि मिरजेतील तिघांचा समावेश आहे. पलूस तालुक्यातील दुधोंडी येथील ६ जणांना लागण झाल्याने पलूस तालुक्यातील रूग्णांची संख्या ५० च्या वर गेली आहे. तर वाळवा तालुक्यात ७ जणांना लागण झाली आहे. तसेच जत तालुक्यातील उमदी येथील एकाला, शिराळा तालुक्यातील वेळापूर येथील एकाला, मिरज तालुक्यातील शिंदेवाडी येथील दोघांना आज कोरोनाची लागण झाली आहे. तर वाळवा येथे एका बाधिताच्या कुटुंबातील चौघांना बाधा झाल आहे. कवठेमहांकाळ तालुक्यातील नागज येथील एकजण बाधित सापडला आहे. तो मुंबईहून आला असून पोलिस दलात असल्याची माहिती आहे. शिराळ्यातील येळापूर येथील एकाला बाधा झाली आहे. सांगली शहरातील अरिहंत कॉलनीतील चारजणांना कोरोनाची बाधा झाली आहे.
सांगली शहराला धक्का देणारी बातमी आज दुपारी समोर आली. या शहरात बेघरांचे घर म्हणून स्थापन करण्यात आलेल्या सावली निवारा केंद्रातील एका वृद्धाला कोरोनाची लागण झाल्याचा अहवाल आला. आपटा पोलिस चौकीजवळ असलेल्या या केंद्रात सत्तरहून अधिक लोक राहतात आणि त्याच्या व्यवस्थापनासाठी दहाहून अधिक लोकांची टीम तेथे काम करते. महापालिका, सामाजिक संस्था आणि देणगीदारांच्या मदतीतून चालणाऱ्या या केंद्राच्या संपर्कात अनेक लोक असल्याने भितीचे वातावरण तयार झाले आहे. सावली निवारा केंद्रातील संशयित रुग्ण तीन दिवसांपूर्वी येथील शासकीय रुग्णालयात दाखल झाला होता. त्याला कोरोनाची लक्षणे दिसू लागल्यानंतर त्याचा स्वाब तपासणीसाठी घेतला होता. त्यातून त्याला लागण झाल्याचे स्पष्ट झाले
