आयुष्यभर रुग्ण सेवा करणाऱ्या परिचारिकेची मृत्युनंतर परवड : नातेवाईकांना सोसावा लागला नाहक मनःस्ताप
सांगली सिव्हिलमध्ये परिचारिकेचे काम करणाऱ्या एका परिचारिकेचा अकस्मात मृत्यू झाल्याने खळबळ उडाली होती. मिरज येथील गवळी कट्टा परिसरात राहणाऱ्या या परिचारिकेचा शनिवारी रात्री अकस्मात मृत्यू झाला. संबंधित परिचारकेने मिरजेतील कोरोनाबाधित डॉक्टरांच्या रुग्णालयात उपचार घेतले असल्याने परिसरातील नागरिकांच्या मागणीवरुन मृतदेह कोविड तपासणीसाठी मिरज सिव्हीलमध्ये पाठविण्यात आला होता.
सांगलीच्या शासकीय रुग्णालयात परिचारिका म्हणून काम करणाऱ्या ५८ वर्षीय महिलेस श्वसनाचा त्रास होऊ लागल्याने खाजगी रुग्णालयात उपचारासाठी दाखल करण्यांत आले होते. उपचारानंतर आठवड्यापूर्वी संबंधित महिलेस घरी पाठविण्यात आले. शनिवारी रात्री महिलेचा घरात आकस्मित मृत्यू झाला. महिलेवर उपचार करणाऱ्या डॉक्टरांना कोरोनाची बाधा झाली असल्याने शेजाऱ्यांनी मृत महिलेची कोरोना तपासणी केल्याशिवाय अंत्यसंस्कार करण्यास विरोध केला. यामुलेल महापालिका प्रशासनाने महिलेचा मृतदेह कोविड तपासणीसाठी मिरज सिव्हील मध्ये पाठविला.
तपासणी अहवाल आल्यानंतच मृतदेहावर अंत्यसंस्कार करण्यांत येणार असल्याचे महापालिका अधिकाऱ्यांनी सांगितले. कोविड तपासणीसाठी पीपीई किट नसल्याने रात्री उशिरापर्यंत महापालिकेची शववाहिका मिळाली नाही. मृताच्या नातेवाईकांनी तहसीलदारांशी संपर्क साधल्यानंतर मिरज सिव्हिल मधून पीपीई किट व बॉडी किट उपलब्ध झाले. नातेवाइकांनी पीपीइ किट आणल्यानंतर मध्यरात्री उशिरा महिलेचा मृतदेह सिव्हीलमध्ये नेण्यात आला. अनेक वर्षे रुग्णसेवा करणाऱ्या परिचारिकेच्या मृत्यूनंतर नातेवाईकांना मनस्ताप सहन करावा लागल्याने संताप व्यक्त होत आहे.
